Møte med kommunen

 

Veldig uferdig og raskt utforma skisse til hus.

Torsdag 26.9.2024 hadde me eit svært oppløftande møte med Sør-Odal kommune, som gjer at me har kome oss eit godt stykke framover i minihusplanane våre.

På møtet blei det avklart at den aktuelle tomta på Galterud er regulert innanfor kategorien "spredt bebyggelse", og at søknad om frådeling av tomt og byggeløyve er godt overkomeleg.

Det einaste me blei råda til, er å få sendt søknad om frådeling i dette kalenderåret, fordi kommunen startar med nye reguleringar neste år.

Dersom tomta er registrert, skal det gå greitt å gå i gong med bygging om 2-3-4 opptil 5 år seinare, etter det me forstod.

Etter å ha vist og forklart skisse til hus, fekk me òg forståing for at ein slik ide er godt overkomeleg.

Endå meir uferdig skisse, av hovudfasaden mot vest (med kaffeflekk).

Me har ein ganske omfangsrik idè. Og det kan godt hende at budsjettet tilseier at me må skjære ein del ned her og der. Men dersom me skulle få alt til, er ideen å lage eit minihus med tre modular: Èin fellesmodul med soverom, stove/kjøkken og bad på omlag 35 kvm og to modular til kvar våre hobbyaktivitetar/gjesterom på 10 kvm kvar, og at desse tre modulane er forma som ein hestesko. I mellom hesteskoen er det tenkt å ha ein vinterhage som er hovudinngang til huset. Vinterhagen kan fungere som drivhus, me kan ha ein grillovn e.l. og ha ein stad å vere særleg om hausten og tidleg vår.

Me er ganske inspirert av svenske "hus i drivhus". Ved å vere inne i eit drivhus, er desse husa beskytta mot vær og vind, og varmesesongen blir forlenga. Dei skal visstnok ha metodar for å unngå at det blir for varmt og fuktig, med system for lufting. Nokon har blant anna nokre lufterøyr gravd ned i jorda som kjem opp i drivhuset, som tilfører varmare luft om vinteren og kaldare om sommaren. Dét, i tillegg til lufteluker i glastaket, kan vere idear som me òg kan bruke. Me kan muligens òg ha ein form for persienne å dra over glastaket på ekstra varme dagar. Og sjølvsagt kunne opne heilt opp med skyvedører ved hovudinngangen.

Ein annan inspirasjon til ei slik løysing, er dei gamle, kvenske smågardane i Aust Finnmark. Då kvenane busette seg i nord, bygde dei ofte eit fjøs inntil nordveggen på huset. Slik ga fjøset litt ekstra ly mot nordavinden.  

Og i staden for å ha all ytterside i glas, er vår variant å kle yttersida av hesteskoen med endå fleire modular, evt. ein slags yttergang utanfor bumodulane; altså utvendige kaldrom som garasje, boder, teknisk rom, vedfyrt badstu, vedsjå, muligens vaskerom m.m. Til slutt å legge eit skråtak over alt, anten eit pulttak, vanleg saltak eller ein variant i mellom. På den eine sida er det behov for størst mogleg takflate mot sør, til solcellepanel, som pulttak kan ivareta. På den andre sida bør taket vere så bratt som mogleg, slik at snø kan skli av, som er enklast å få til med saltak. Garasje og teknisk rom bør vere i brannhemmande materiale, leca e.l. Vidare er tanken å kle dei ytste fasadane i materiale som ikkje krev vedlikehald, f.eks. aluminiumsplater. Loftsarealet er òg tenkt å vere eit ikkje-oppvarma areale, der deler av taket, det som er over vinterhagen er av glas. Loftsarealet kan kanskje òg bli brukt til noko av det som er nemnd, som ein badstumodul, eit opphaldsareale å sitje på når det høver i forhold til temperatur, til lager e.a., dersom det er plass og konstruksjonen tåler det.

Det er mange ting å tenkje på undervegs, som me diskuterer. Det er mykje snø i området om vinteren. Og med dei utvendige bodene; Blir det då behov for veldig mykje snømåking rundt heile huset, for å sikre tilgang til bodene? Kanskje det då bør vere gjennomgangsdører frå den eine boden til den andre, evt. ekstra langt takutspring til å gå under om vinteren. 

Ved å kle inn dei tre bumodulane med kaldloft og kaldrom, har bumodulane i alle fall fått eit ekstra lag med vern mot både varme og kulde.

Me håpar på å ha ein haug med løysingar som bidrar til låge buutgifter. Solcellepanel til eigen straumproduksjon, husbatteri, smartløysingar i forhold til fordeling av straumproduksjonen, solfangarar, grunnvarme, vassboren golvvarme, vedfyring med slynge kobla til varmtvasstank og golvvarmen, attvinning av gråvatn, muligens attvinning av varmtvatn, eit minihus kan krevje ei god form for lufting, gjerne ei enkel løysing som dei har i såkalla aktivhus... Det kjem kanskje meir på lista etter kvart, men blir til slutt avhengig av kva me har råd å investere i.

Det kan bli snakk om ei tomt på to mål. Den ekstra plassen kan brukast til diverse dyrking, som frukttre, bærbuskar, grønnsakshage, ein liten kaningard... (det siste må det truleg forhandlast om her og der).

Så nå blir det truleg søknad om frådeling av tomt i 2024. På sikt må me selje huset me bur i nå, for å ha kapital til nytt. Det blir òg ein prosess. Vidare ha ein stad å bu midlertidig. Hytta kan då bli aktuell. Eller kanskje eit lite krypinn på hjul. Og så finne ein entreprenør e.l. som kan hjelpe oss med heile prosessen.

Vedskjul av gratis materiale

 

Oppdatert 1.12.24:

Måtte flytte konstruksjonen slik at den har blitt slik:

Me klarte å få til flyttinga med god hjelp frå bonussvigerfar som stilte opp med gaffeltruck. Med forlenging vha to plankar og sikring med stropper, klarte me å flytte to doble båsar om gongen. Deretter skru det saman igjen, montere takplatene på nytt, setje på eit møne og bære veden tilbake på plass. Alt fekk me gjort på ei helg.

…og nå er «stallen» til og med pynta til jul.

Før flyttinga blei denne teksten skrive:

Her er eit nytt innlegg som ikkje er heilt minihusrelatert, men likevel, på ein måte, er det likevel. Har utvida til endå eit nytt bygg, til heimen som ikkje er mini. Ein kald vinter i 23/24 gjorde eit djupt innhogg i vedlageret. Ny tilgang til kortreist ved i nabolaget (tre som folk vil ha vekk og ved som ligg igjen etter skogsdrift), alt dette fører til nye behov for vedskjul. Med det får eg trent meg opp til litt hobbysnekring, med tanke på framtidige miniplanar. 

Gratis pallar frå Fenstad

Det viktigaste er å erfare kva ein kan få opp ved hjelp av gratis materiale. Søkte på Finn.no i sommar, og fann fram til over tjue gratis europallar i nabobygda. Eit par turar, så var dei henta med den vesle hengaren. Har elles ein del impregnert materiale etter eit gjerde ståande bak garasjen. Den materialen blei henta, med ein god del hjelp, frå ein skule i Lørenskog for mange år sidan.

Byggestart

Har gjort det enkelt. Berre lagt ut nokre plankar og klossar på grusen, prøvd å halde det i vater, og så brukt pallane til golv og vegger.

Er ikkje noko flink til å lage byggeteikningar. Prøver meg berre fram. Oppdagar feil og manglar undervegs, og improviserer for å rette opp. Har gjort mitt beste med vatringa. Pallane er ikkje nødvendigvis nøyaktige konstruksjonar, så måtte justere og improvisere endå meir. Det fine med pallar, er likevel at dei skaper eit fundament å jobbe ut frå. Det blir lettare å sjå korleis det kan bli, og dei skaper ei ramme.

Eksempel 1 på improvisasjon 

Eksempel 2 på improvisasjon

Det tar ganske lang tid. Står og tenkjer, klør meg i hovudet, smårettar på ting, tenkjer meir.

Men til slutt blei eg ganske nøgd. Vedskjulet blei i grunnen ganske solid.

Det einaste som har kosta, er plasttak frå Jem og Fix, beslag og skruar. Det blei vel ein 2-3000,- til saman. Plasttaket valte eg fordi eg trur det vil bidra litt meir til soltørking av veden. Dessutan kondenserer det meir frå ståltak når det er temperaturskifte, slik at vatn dryp ned på veden. Til sist er plasttak rimelegare. Ulempa er at denne type plasttak ikkje er så veldig haldbare i lengda. Ikkje er det så miljøvennleg heller. Men alt i alt trur eg ikkje det er store "fotavtrykket" på denne sjåen.

Kona meinte at eg burde ha satt opp skråtaket andre vegen, slik at regn og snø ikkje kjem ned på gardsplassen. Ho har nok rett i at det ikkje blir mindre snømåking framover. Og det er muligens ikkje heilt gunstig at vatn frå taket samlar seg på gardsplassen. Men nedbør står mest inn frå vest, slik at eg trur ein stor opning frå den kanten kan gjere veden meir utsatt frå nedbøren. Dessutan trur eg det ville rent meir vatn inn under pallane, viss eg lot vatnet renne bak sjåen. Likevel kan det hende at eg må vurdere takrenner på vestsida og eit form for mønebeslag på austsida for å halde regnet endå meir unna.

Denne vedsjåen er særleg tenkt å bli brukt til mellomlagring av uferdig ved. Med denne kan eg ha stokkane lagra tørt, og kappe og kløyve dei frå den store opninga på baksida når eg har tid. Tidlegare har det vore eit stress å bli ferdig med store vedhaugar som har lege ubeskytta mot regn.

Vurderer òg å pynte litt med ekstra plank og maling til våren. For når ein trur at ein har avslutta eit slikt prosjekt, byrjar nye grublingar, hovudkløing og smårettingar.